Die laaste byeenkoms van die 2025 nasionale tydrenkampioenskap beloof drama en strawwe kompetisie wanneer topspanne dit uitspook om kampioenskapsglorie.
Die TRAC N4-tydren, bekend vir sy rowwe terrein, asemrowende bosfases en lewendige atmosfeer, beloof ‘n onvergeetlike motorsportskouspel op 31 Oktober en 1 November.
Dit is die vyfde agtereenvolgende jaar dat Dullstroom die finaal aanbied.
Dit lok elite-tydrenspanne en passievolle aanhangers van regoor Suid-Afrika.
Die tydrenkampioenskap word beskou as die oudste kampioenskap in Suid-Afrikaanse motorsport.
Die kompetisie in Dullstroom sal bepaal wie, na hewige wedywering sedert Mei, uiteindelik met die louere wegstap.
Dit strek oor twee adrenalien-gevulde dae, met ongeveer 180 km se uitdagende terrein deur van die mees ongetemde woude in Mpumalanga.
Smal, tegniese deurgange en vinnig veranderende oppervlaktes toets spoed, presisie en uithouvermoë – die perfekte slagveld vir ‘n kampioenskapsfinaal.
Sedert 2020 speel die TRAC N4-tydren ook ‘n belangrike rol in die ondersteuning van die plaaslike gemeenskap.
Opbrengste gaan na die Dullstroom Epilepsiesentrum wat noodsaaklike dienste lewer vir individue en gesinne wat met epilepsie leef.
Die kampioenskap skep verder werk en bevorder toerisme in Dullstroom en Belfast.
Toegewyde toeskouersones bied aanhangers die beste plekke om die aksie te aanskou.
Vir meer besonderhede, volg @TRACN4 of @SARallychamps op sosiale media, besoek www.tracn4.co.za, of stuur ‘n e-pos aan die tydrensekretaris by irene.myburgh@outlook.com.
