Dep’t faal werknemers by Hooggeregshof in Mbombela, sê VSA

Die Vereniging van Staatsamptenare (VSA) is uiters bekommerd oor die Departement van Indiensneming en Arbeid se volgehoue nie-nakoming van beroepsgesondheids- en veiligheidsregulasies by die Mpumalanga Hooggeregshofgebou in Mbombela.

Volgens ‘n woordvoerder van die VSA, Flip van der Walt, het die Departement van Justisie en Kantoor van die Hoofregter 60 dae  gehad om aan die Wet op Beroepsgesondheid en Veiligheid se standaarde te voldoen, maar die sperdatum het op 20 Januarie verstryk en die hof voldoen steeds nie daaraan nie.

Lees meer: Hooggeregshof bly gedeeltelik ontruim

“Die situasie het vererger weens swaar reën, wat bestaande probleme soos lekkende dakke, ‘n nie-funksionele HVAC-stelsel, geslote nooduitgange op die vierde verdieping en nie-operasionele hysbakke vererger,” sê hy.

Boonop is brandblussers sedert 2019 nie gediens nie, en kantore wat vir lêerversameling aangewys is, word deur ‘n ondraaglike reuk geteister.

Die VSA is ook bewus van toestande in administratiewe kantore waar emmers op die vloere geplaas word om reënwater op te vang.

“Ons is ontsteld oor die gebrek aan reaksie van die departement oor versoeke vir inspeksies by verskeie howe en kantore in Mpumalanga.

“Hierdie versoeke word deur inspekteurs geïgnoreer, wat dui op intimidasie wat hulle verhoed om regeringsgeboue te inspekteer.

“Die VSA sal voortgaan om enige geboue te sluit wat ‘n risiko vir die gesondheid en veiligheid vir werknemers en lede van die publiek inhou,” sluit Van der Walt af. 

Sien ook: Menslike oorskot in Tjakastad ontdek