Twee 15-jariges aangekeer vir moord na huishoudelike geweld

Twee 15-jariges sal na verwagting vandag in die hof verskyn, nadat hulle in twee afsonderlike voorvalle Vrydag na bewering familielede doodgemaak het.
Volgens die polisie hou beide voorvalle verband met huishoudelike geweld.
In Bosbokrand is ‘n 65-jarige man die aand na ‘n bakleiery met sy vrou glo deur een van sy kinders doodgesteek.
‘n 49-jarige man is ook die aand in Elandshoek in die straat aangetref met verskeie wonde. Hy is op die toneel dood verklaar. Sy 15-jarige nefie behoort vandag in verband daarmee in die Nelspruit-landdroshof te verskyn.
Die polisie soek ‘n man wat hulle glo hulle kan help in ‘n moordondersoek na ‘n 30-jarige vrou Sondag in Acornhoek na bewering deur haar vriend doodgeskiet is.
Appearance Ndlovu of enigiemand met inligting oor hom is gevra om luit. kol. Albert Manzini te kontak by 082-469-1031.
In ‘n afsonderlike voorval veg ‘n 32-jarige vrou in die hospitaal vir haar lewe nadat sy Saterdag in Mhala geskiet is. ‘n 36-jarige man het haar na bewering geskiet en gewond voor hy homself geskiet het. Die polisie ondersoek sy dood.
Die 41-jarige David Sizanempi Palmer het Vrydag in die Nelspruit-landdroshof verskyn op klagte van bedrog, geldwassery, en diefstal of alternatiewelik die oortreding van die belastingadministrasiewet.

Volgens die Valke in Mpumalanga se woordvoerder, kapt. Dineo Sekgotodi, het Palmer na bewering deur ‘n maatskappy wat in Maart 2018 geregistreer is, Tshangakuye Trading, vervalste belastingopgawes by die inkomstediens ingedien.
Daardeur het die Suid-Afrikaanse Inkomstediens (Said) na beraming R203 681 verloor.
Hy is borgtog van R2 000 toegestaan en die saak is uitgestel tot 15 September.

Volgens Sekgotodi verwag hulle om nog arrestasies te maak soos die ondersoek vorder.