Man wat glo Duitse toeris op Numbi-pad vermoor, bly in aanhouding
Written by Mireille on October 19, 2022
Die man wat aangekla word van die moord op ‘n Duitse toeris tydens ‘n mislukte kaping op die Numbi-pad bly in aanhouding tot volgende Vrydag.
Napoleon Joseph Nyalungu (35) is verlede Woensdag in Nelspruit aangekeer. Hy word daarvan beskuldig dat hy die 67-jarige Jörg Schnarr op 3 Oktober op pad na die Krugerwildtuin doodgeskiet het.
Nyalungu het vandag weer in die Kabokweni-landdroshof verskyn. Volgens polisiewoordvoerder, brig. Selvy Mohlala, sal hy op 28 Oktober formeel vir borgtog aansoek doen.
============
14 Oktober 2022, 15:19
‘n Verdagte is aangekeer vir die moord verlede Maandag op ‘n Duitse toeris. Die 67-jarige Jörg Schnarr is tydens ‘n mislukte kaping op die Numbi-pad onderweg na die Krugerwildtuin doodgeskiet.
Lees meer: Beloning uitgeloof vir inligting na vermeende kapers Duitse toeris doodskiet
Volgens polisiewoordvoerder, brig. Selvy Mohlala, is Napoleon Joseph Nyalungu (35) Woensdagaand in Nelspruit aangekeer.
Hy het vandag in die Kabokweni-hof verskyn op aanklagte van moord, poging tot moord en poging tot ‘n kaping. Die saak is uitgestel tot 19 Oktober.
Lees ook: Massiewe addisionele sekuriteit word op Numbi-pad aangebring
