ONS SPAN:

Amanda Botha

amandabotha

Ek het al so baie dinge gedoen en beleef in my oudag (hoor hoe kraak die bene) dat ek boeke vol kan skryf. Ek is ongelukkig ‘n lewensvraat, (Gelukkig nie suurstofdief nie). Soos enige ma, spog ek vreeslik oor my 2 dogters en dink hulle is die beste ding op hierdie aarde, daarom sal ek van daardie onderwerp weg bly. My ma het altyd gesê ek is ‘n aandagvraat, het altyd konserte gehou vir my nefies en niggies wanneer hulle kom kuier het. Maar nie verniet nie, hulle moes 5c betaal, want ek het ‘n enorme gat in die soet tand.
Dit was dieselfde toe ek 'n baba was: as die tietiebottel leeg was het ek hom altyd uitgehou en gesê:  "Nog asseblief".  Hoop jy het lekker gelag en nou ken jy my ook bietjie beter en verstaan die oorgewiggies….. die soetigheid jy weet.

 

Frieda Rieger

friedareigher

Woon in die Laeveld sedert 1991, en het by Radio Laeveld begin uitsaai in Desember 2008. Tans vryskut-aanbieder van “Jubel en Juig” op Sondae. Ek is ook saam met Amanda mede-aanbieder van “Mengelmoeskardoes” wat ook op Sondae tussen 12:00 en 14:00 vanuit die ateljee uitgesaai word. Skakel die Ateljee en ons saai jou versoek uit.  Ek skryf graag, het 'n passie vir die goeie lewe en leef my Christenskap ten volle uit. Musiek maak my dag.

 

Tom Farmer

tomfarmer

Ek het in Julie 2003 by Radio Laeveld begin uitsaai. Dinsdagaande was my kuieraande met die Laevelders en “Bitterbessiebos” het die lig gesien, saam met inligtingsprogramme oor die sewe wonders van die wêreld en “Vandag in die verlede”. Van Augustus 2004 tot Desember 2004 het ek ook die ontbytprogram aangebied. Tans geniet ek dit om op vryskutbasis vir Radio Laeveld te werk.

Dis lekker om in kontak met die Laevelders te bly en ek geniet elke Sondag wanneer ek gemaklike musiek kan speel in “My Gunsteling Uur“ om 9:00.

 

Derek Wolf

derekwolf

Derek is 'n vryskut-omroeper by Radio Laeveld. Op Maandagaande tussen 18:00 en 20:00 is dit tyd vir “Potblou” en “Maandagaand Gospel”. Sondae kan jy gerus nadersit en luister na waarhede en openhartige gesprekke uit die Woord in die programme  "Stap Saam Deur Die Bybel" en "Hartlangs".

 

Roelf Van Jaarsveld

roelfvanjaar

Van radio na rolprente na televisie en terug na radio. Die sirkel is voltooi!

Roelf is bekend vir sy voortreflike klankwerk by die SAUK: Staal Burger, Flink uit die vere en talle dramas. Daar is seker nie ‘n radiopersoonlikheid uit die Gouejare by die SAUK saam met wie hy nie ‘n pad geloop het nie. Daarna saam met Jamie Uys en Daan Retief in die movies: Salomien, Breekpunt, Jamie 21, Beautiful People, Funny People, Mooimeisiesfontein, Die Rebel, The Gods Must Be Crazy, Funny Faces en ’n paar internasionale produksies.

Sy televisieloopbaan loop net so wyd: Brood vir my broer, Jasper le Feuvre, Die vlaktes duskant Hebron, Arende 3 en honderde dokumentêre programme waarvan een ‘n silver toekenning in Texas, VSA, vir beste regisseur en redigeerder verdien het. Maar na al die jare loop die radiobloed  nog dik in sy are. Dis vir hom dus ‘n groot voorreg om meer as dertig jaar se radio/film/TV-ondervinding terug te ploeg tot voordeel van Radio Laeveld se luisteraars!

Roelf behartig ook die Radio Laeveld nuus as nuusanker, weeksdae die nuusprogram, “Dagblad”, Dinsdag tot Donderdag tussen 19h00 en 23h00 is dit 'n verskeidenheid programme.

 

 Ludi Botha

Ludi-Botha

Ek bly so te sê my hele lewe in die laeveld. Op my tuisdorp van Witrivier is ek glad nie 'n vreemdeling nie. Ek het n passie vir die musiek, natuur en my medemens. Enige iemand wat my ken weet ek is n geweldige terggees maar ook 'n beste vriend. My familie en vriende is my alles en ek spandeer elke spaar oomblik saam hulle. Ek het tydens die Innibos periode van 2012 by die radio stasie aangesluit en myself totaal met die nuwe uitdaging laat meesleur.

Ludi bied die 'Outyd tot Noutyd', 'Die Top 20' program en 'AlmalSaam' weekliks aan.

 

 Helmi du Plessis

Helmi-Du-Plessis

Mense vra altyd waar jy vandaan kom en dan staan ek altyd met 'n mond vol tande - moet mens dan se waar is jy gebore of waar het jy skoolgegaan of waar het jy studeer? So, dan noem ek maar die hele lys. Ek is in Kimberley gebore, het daar my skoolloopbaan begin en kort daarna het ons na Bloemfontein, Centurion en later Pietersburg verhuis. Ek het gematrikuleer aan die Hoerskool Pietersburg en het 'n jaar na matriek eers gewerk voordat ek Teologie begin studeer het in Somerset-Wes in die Kaap. 

Ek het my werksloopbaan in Tzaneen begin as jeugwerker by 'n plaaslike gemeente en ook hoërskool. In hierdie tyd, het ek my liefde en passie vir jongmense ontdek en het besluit om myself ook in die onderwys te bekwaam en het in 2007 voltyds begin skoolhou. 

My stokperdjie is om kreatiewe koeke te bak soortgelyk aan die van Cake Boss en dit hou my goed besig! Ek het ook 'n dogtertjie van 4 wat die middelpunt van my lewe is. In Desember 2012 het ons na die Laeveld verhuis en is baie gelukkig hier! Ek ag dit 'n heerlike lekkerte om by Radio Laeveld betrokke te wees en ek is dankbaar dat ek my bediening ook hier kan uitleef.

Helmi bied op Sondagoggende die program Kruispad en Saterdag 'Vat Die Pad' aan.

 

 Robin Jansma

Robin-Jansma

Ek het op 1 Augustus 2003 by Radio Laeveld as aanbieder begin en het al verskeie programme van ontbyt tot laataand aangebied. Ek het vir bykans nege jaar die Saterdagoggend program "Die Hande In Die Tuin" saam met Diane Ross van Montana Garden Pavilion aangebied en is ook later as Program Bestuurder en Stasie Bestuurder op 100.5fm aangestel. 

"Ek het met die geboorte van Gemeenskap Radio in Suid Afrika in Pretoria by Radio Rippel (nou GrootFM) as spitstyd aanbieder begin uitsaai, en later ook 'n draai op KykNet met DKNT en MpowerFM as Verkoopsbestuurder gemaak voor ek die Laeveld berge op die rug van 'n Harley opgesoek het". Daar is volgens my nie 'n beter plek om 'n familie te begin nie, en as jy eers die water hier geproe het is daar nie terugkeer nie. Een hoogtepunt wat uitstaan is die eerste internasionale buite-uitsending vanuit Nederland op Radio Laeveld in 2007.

Die wêreld van radio verander so vinnig in Suid Afrika en maak dit 'n besonderse uitdaging om in hierdie tyd deel daarvan te wees. Aanlyn, digitaal of deur die FM radiogolwe, die beste ervaring is wanneer jy 'n spesiale oomblik en/of liedjie met iemand op daardie oomblik kan deel.

 

OOR ONS:

Radio Laeveld het op 1 Maart 2003 vir die eerste keer  'n vier jaar Gemeenskap Uitsaailisensie ontvang. Op 31 Mei 2003 word daar vir die eerste keer op die Radio Laeveld-senders uitgesaai. Sedertdien het Radio Laeveld reeds weer sy tweede vierjaar-lisensie ontvang en word die seinverspreiding nou deur Sentech vanaf Kaapsehoop gedoen. 
Radio Laeveld se uitsaaigebied dek Nelspruit, Witrivier, Baberton en omliggende Laeveldstreke van Kaapsehoop, Kaapmuiden, Malelane, Hectorspruit, Komatipoort, Skukuza, Hazyview, Sabie Graskop, en Lydenburg

 

Visie:
Ons visie is om die mees gerespekteerde en dinamiese gemeenskapsradiostasie in Suid Afrika te word.

Missie:
Ons missie is om die Christelike afrikaansprekende gemeenskap in ons kontrei met passie te vermaak, in te lig en te dien.

Ons waardes:
Ingelig, Innoverend,Inspirerend,Opreg,Entoesiasties.

 

 


KAART VAN DIE RADIO LAEVELD UITSAAIGEBIED:

broadcastmap2


IMG 2493 IMG 2494 IMG 2495
Daar word lekker gesels in ons ateljee

IMG 2497
Coenie besig met redigering in ons opname ateljee.