amandabotha

Amanda Botha

Ek het al so baie dinge gedoen en beleef in my oudag (hoor hoe kraak die bene) dat ek boeke vol kan skryf. Ek is ongelukkig ‘n lewensvraat, (Gelukkig nie suurstofdief nie). Soos enige ma, spog ek vreeslik oor my 2 dogters en dink hulle is die beste ding op hierdie aarde, daarom sal ek van daardie onderwerp weg bly. My ma het altyd gesê ek is ‘n aandagvraat, het altyd konserte gehou vir my nefies en niggies wanneer hulle kom kuier het. Maar nie verniet nie, hulle moes 5c betaal, want ek het ‘n enorme gat in die soet tand.
Dit was dieselfde toe ek 'n baba was: as die tietiebottel leeg was het ek hom altyd uitgehou en gesê:  "Nog asseblief".  Hoop jy het lekker gelag en nou ken jy my ook bietjie beter en verstaan die oorgewiggies….. die soetigheid jy weet.


 

friedareigher

Frieda Rieger

Woon in die Laeveld sedert 1991, en het by Radio Laeveld begin uitsaai op Desember 2008. Tans vryskut-aanbieder van “Jubel en Juig” op Sondae. Ek is ook saam met Amanda mede-aanbieder van “Mengelmoes Kardoes” wat ook op Sondae tussen 12:00 en 14:00 vanuit die ateljee uitgesaai word. Skakel die Ateljee en ons saai jou versoek uit.  Ek skryf graag, het 'n passie vir die goeie lewe en leef my Christenskap ten volle uit. Musiek maak my dag.


tomfarmer

Tom Farmer

Ek het in Julie 2003 by Radio Laeveld begin uitsaai. Dinsdagaande was my kuieraande met die Laevelders en “Bitterbessiebos” (wat nou deur Amanda aangebied word) het die lig gesien, saam met inligtingsprogramme oor die sewe wonders van die wêreld en “Vandag in die verlede”. Van Augustus 2004 tot Desember 2004 het ek ook die ontbytprogram aangebied. Tans geniet ek dit om op vryskutbasis vir Radio Laeveld te werk.

Dis lekker om in kontak met die Laevelders te bly en ek geniet elke Sondag wanneer ek gemaklike musiek kan speel in “My Gunsteling Uur“ om 14:00.


derekwolf

Derek Wolf

Derek is 'n vryskut-omroeper by Radio Laeveld. Op Maandagaande tussen 18:00 en 20:00 is dit tyd vir “Potblou” en “Maandagaand Gospel”. Sondae kan jy gerus nadersit en luister na waarhede en openhartige gesprekke uit die Woord in die programme  "Stap Saam Deur Die Bybel" en "Hartlangs" - wat tussen 15:00 en 17:00 uitgesaai word.

 

roelfvanjaar

Roelf Van Jaarsveld

Van radio na rolprente na televisie en terug na radio. Die sirkel is voltooi!

Roelf is bekend vir sy voortreflike klankwerk by die SAUK: Staal Burger, Flink uit die vere en talle dramas. Daar is seker nie ‘n radiopersoonlikheid uit die Gouejare by die SAUK saam met wie hy nie ‘n pad geloop het nie. Daarna saam met Jamie Uys en Daan Retief in die movies: Salomien, Breekpunt, Jamie 21, Beautiful People, Funny People, Mooimeisiesfontein, Die Rebel, The Gods Must Be Crazy, Funny Faces en ’n paar internasionale produksies.

Sy televisieloopbaan loop net so wyd: Brood vir my broer, Jasper le Feuvre, Die vlaktes duskant Hebron, Arende 3 en honderde dokumentêre programme waarvan een ‘n silver toekenning in Texas, VSA, vir beste regisseur en redigeerder verdien het. Maar na al die jare loop die radiobloed  nog dik in sy are. Dis vir hom dus ‘n groot voorreg om meer as dertig jaar se radio/film/TV-ondervinding terug te ploeg tot voordeel van Radio Laeveld se luisteraars!

Roelf behartig ook die Radio Laeveld nuus as nuusanker, weeksdae die nuusprogram, “Dagblad”, Donderdagaande tussen 20h00 en 23h00 is dit “Potjiejol” en Sondagoggende om 07:00 'n uur van Verrykende Geestelike musiek.

 


  

endrina

Endria

Endrea is 'n deeltydse aanbieder by Radio Laeveld sedert die ontstaan van die Radio. Sy is die organiseerder van die  jaarlikse Kersloffees wat nou al ‘n instelling tydens Desember in die Laeveld geword het. Endria bied  die program "Met Woorde en Note" aan wat Sondagaande om 18:00 uitgesaai word en op Maandagaande om 23:00 herhaal word. Dit is 'n program saamgestel uit geestelike musiek met  opbouende boodskappe wat deur 'n verskeidenheid leraars van reg oor die land gelewer word.

 


  

marinana

Mariana
 
Mariana versorg 'n aantal kort geestelike insetsels vir Radio Laeveld wat deur die loop van die dag uitgesaai  word.  Op Sondag aande om 22:00 is dit “Loof en te getuig”. Luisteraars kan gebeds-versoeke rig, getuienis lewer en daar word lekker lofprysingsmusiek gespeel. Die program word Dinsdagaande 23:00 herhaal

 


 

1herman

 Herman Pieterse

As Vryskut-omroeper het ek reeds in 2003/2004 as omroeper by 'n klein gemeenskaps- radiostasie vir 'n Oos-Kaapse gemeenskap, nl. Radio Unique begin. Ek is dol oor die Laeveld, histeries oor die natuur, hou van visvang, motorsport, motorfietse en moes die omroeperwerk jare terug as beroep gekies het. Daarom het ek in 2004 by Radio Laeveld aangesluit.

Maandae:18:00 - 23:00 – “Maandagaand Kapperjolle” - Vrolike opgewekte musiek deurspek met lekker rock, goue treffers van die vroegste jare tot selfs van die beste Afrikaanse treffers uit die verlede sowel as die hede. Ek poog om die blou uit die Maandag te haal, praat oor die nuutste films, skerts, spot en natuurlik musiek - musiek - musiek.
 Vrydae: “Melomanie” (iemand wat mal is oor musiek) 20:00 - 23:00. Dit is braai, kuier, versoektyd met plaaslike sowel as buitelandse musiek. Dit is ook 'n inbelprogram met versoeke en word afgesluit met 'n spesialisprogram genaamd “Laataand Rock” wat begin om 23:00 tot middernag en neem jou deur die verskillende genre's van rock, kunstenaars, groepe en individue, hetsy plaaslik of buitelands en selfs vergete rockgroepe. Iets vir die ou wat kan ROCK.  
Saterdae: Vanaf 07:00 - 09:00 Laeveld Dagblad bied jou 'n sakvol lekker dinge: Van Hengel tot veldresepte.
Vanaf 11:00 - 12:00 “Doen ons dit self” - 'n program vir die luisteraar wat graag wil weet wat hy als kan vermag met sy eie motorhuis toerusting, sy tuin en alle doen-dit-jouself projekte - in die program “Doen-dit-Jouself met Mica”.
 
Ontbyt Jolyt saam met Herman en Antz is 'n weeklikse program tussen 06:00 - 09:00. Hier skerts ons met die luisteraar op pad werktoe + speel op-en-wakker musiek.

 


 

Ludi-Botha

 Ludi

Ek bly so te sê my hele lewe in die laeveld. Op my tuisdorp van Witrivier is ek glad nie n vreemdeling nie. Ek het n passie vir die musiek, natuur en my medemens. Enige iemand wat my ken weet ek is n geweldige terggees maar ook n beste vriend. My familie en vriende is my alles en ek spandeer elke spaar oomblik saam hulle. Ek het tydens die Innibos periode van 2012 by die radio stasie aangesluit en myself totaal met die nuwe uitdaging laat meesleur.

 


 

Helmi-Du-Plessis

 Helmi du Plessis

Mense vra altyd waar jy vandaan kom en dan staan ek altyd met 'n mond vol tande - moet mens dan se waar is jy gebore of waar het jy skoolgegaan of waar het jy studeer? So, dan noem ek maar die hele lys. Ek is in Kimberley gebore, het daar my skoolloopbaan begin en kort daarna het ons na Bloemfontein, Centurion en later Pietersburg verhuis. Ek het gematrikuleer aan die Hoerskool Pietersburg en het 'n jaar na matriek eers gewerk voordat ek Teologie begin studeer het in Somerset-Wes in die Kaap.

Ek het my werksloopbaan in Tzaneen begin as jeugwerker by 'n plaaslike gemeente en ook hoërskool. In hierdie tyd, het ek my liefde en passie vir jongmense ontdek en het besluit om myself ook in die onderwys te bekwaam en het in 2007 voltyds begin skoolhou.

My stokperdjie is om kreatiewe koeke te bak soortgelyk aan die van Cake Boss en dit hou my goed besig! Ek het ook 'n dogtertjie van 4 wat die middelpunt van my lewe is. In Desember 2012 het ons na die Laeveld verhuis en is baie gelukkig hier! Ek ag dit 'n heerlike lekkerte om by Radio Laeveld betrokke te wees en ek is dankbaar dat ek my bediening ook hier kan uitleef.

 

 


 

Robin-Jansma

 Robin Jansma

Ek bied tans die spitstydprogram #AlmalSaam 3-6nm op Radio Laeveld 100.5fm aan. Ry saam huistoe, toets jou kennis in #5om5 en gesels agter die skerms rugby met die Steval Pumas. Jy kan ook na Hallo Maandag op Maandagaande van 8-11nm luister met jou keuse van liedjies, onderhoude met kunstenaars oor lirieke en laataand speletjies soos Sudoku en Blokkiesraaisels. Ek speel ook die heel nuutste treffers tussen 6-7nm op 'n Donderdagaand.

Ek het op 1 Augustus 2003 by Radio Laeveld as aanbieder begin en het al verskeie programme van ontbyt tot laataand aangebied. Ek het vir bykans nege jaar die Saterdagoggend program "Die Hande In Die Tuin" saam met Diane Ross van Montana Garden Pavilion aangebied en is ook later as Program Bestuurder by Radio Laeveld aangestel. Intussen was ek ook by verskeie ander projekte soos Innibos.fm (aanlyn fees radio), Cansa Relay For life en Africa Bike Week betrokke en geniet ek die interaksie tussen mense wat musiek waardeer en geniet.

"Ek het met die geboorte van Gemeenskap Radio in Suid Afrika in Pretoria by Radio Rippel (nou GrootFM) as spitstyd aanbieder begin uitsaai, en later ook 'n draai op KykNet met DKNT en MpowerFM as Verkoopsbestuurder gemaak voor ek die Laeveld berge op die rug van 'n Harley opgesoek het". Daar is volgens my nie 'n beter plek om 'n familie te begin nie, en as jy eers die water hier geproe het is daar nie terugkeer nie. Een hoogtepunt wat uitstaan is die eerste internasionale buite-uitsending vanuit Nederland op Radio Laeveld in 2007.

Die wêreld van radio verander so vinnig in Suid Afrika en maak dit 'n besonderse uitdaging om in hierdie tyd deel daarvan te wees. Aanlyn, digitaal of deur die FM radiogolwe, die beste ervaring is wanneer jy 'n spesiale oomblik en/of liedjie met iemand op daardie oomblik kan deel.

 

 


 

Antz-van-der-Heever

 Antz van der Heerver

Die Radio gogga het my al in 2009 gebyt en ek geniet dit elke dag net meer en meer. Noudat al my kinders groot en uit die huis is, kan ek al daardie jare se "uselss information" wat ek met hulle gedeel het, en sekerlik mee ge-irriteer het, met die arme onwillige luisteraars deel. En o ja, dit help my ook om hierdie kombuistaal wat ons so graag praat, te probeer vervang met 'n beter spreektaal. Ons skeep Afrikaans geweldig af en ons woordeskat raak erg beperk.

Ek is baie lief vir die buitelewe en swem, gimnasium, motorfiets saamtrekke, rock musiek en om die sonsondergange en opkomste te bestudeer met 'n glasie wyn in die hand....o ja, en ek is vreeslik met die maan gepla, veral die volmaan!

Was in Pretoria gebore en geskool. Is 'n Van Helsdingen wat my skoene van binne af deurslyt. Lekker om met jou kennis te maak.