100.5FM Nuus
15 November
07:00
# Verhoogde paraatheid aan beide kante van Lebombo-grenspos
# Trump kies entstof-skeptikus en sy eie prokureur vir sy administrasie
# Krieket: Engeland wen derde T20 teen Windies om reeks te beklink
# Die Grensbestuursowerheid bly op ‘n hoë gereedheidsgrondslag by die Lebombo-grenspos. Betogings in Mosambiek het gister weer ‘n tydelike sluiting veroorsaak, maar die grens het gistermiddag heropen vir vragvervoer. Die onrus volg op die bestrede verkiesing in die buurland. Die oorgrens-bemiddelaars versoek bestuurders op die N4 Maputo-deurgang om versigtig te wees. Die kommissaris van die Grensbestuursowerheid, Michael Masiapato, sê kommer oor veiligheid pla steeds: KLANK: ENG-MasiapatoOnMozambique
# Die LUR vir Gesondheid in Mpumalanga, Sasekani Manzini, het gister by Piet Retief-hospitaal besoek afgelê. Dit na ‘n hewige storm Sondag groot skade in die gebied aangerig het aan geboue en infrastruktuur wat groot areas ook sonder elektrisiteit en water gelaat het. Manzini het bevestig die dak, plafon en heining van die hospitaal is beskadig, maar dat die heining die ergste skade gely het en dat bedrywighede by die hospitaal normaalweg voortgaan. KLANK:
# Die GOOD-party vra ʼn volledige ondersoek na finansiële wanbestuur by die Suid-Afrikaanse Sokkervereniging. Dit volg nadat SAFA-president, Danny Jordaan, en twee medebeskuldigdes vroeër die week gearresteer en aangekla is van bedrog en diefstal van sowat 1,3-miljoen-Rand. Die drie is uit op borgtog van 20-duisend-Rand elk. Lulama Benge van GOOD sê die nasionale sokkerhelde het te lank finansieel gesukkel terwyl die uitvoerende gesag beskuldig is dat hulle in weelde leef: KLANK: ENG LulamaonSAFA
# Amerika se verkose president, Donald Trump, het Robert F. Kennedy Junior gekies om die Departement van Gesondheid en Humanitêre Dienste in sy tweede Withuis-administrasie te lei. Die entstof-skeptikus het in die 2024-presidentsveldtog as onafhanklike gestaan voordat hy Trump gesteun het. Die verkose president het Todd Blanche benoem as adjunk-prokureur-generaal. Blanche het Trump vroeër vanjaar in sy verhoor in New York verteenwoordig waar hy skuldig bevind is dat hy sakerekords vervals het. Die voormalige Georgia-kongreslid, Doug Collins, is gekies om die Departement van Veterane-sake te lei.
# Krieket: Engeland het die Wes-Indiese Eilande met drie paaltjies in die derde T20 op St Lucia geklop en loop nou voor met drie – nul in die reeks van vyf. Ondanks kaptein Rovman Powell se indrukwekkende 54, is die tuisspan tot 145 vir agt in hulle 20 boulbeurte beperk. Saqib Mahmood en Jamie Overton het drie paaltjiese elk laat kantel. Die besoekers het aanvanklik gesukkel met die telling op slegs 37 vir drie, maar Sam Curran en Liam Livingstone het gehelp met die herstel en Engeland het die teiken gehaal met vier balle oor.
# Die rand verhandel teen 18-rand-23-sent teen die dollar, 19-rand-22-sent teen die euro en 23-rand-12-sent teen die pond. Bitcoin verhandel teen 87-duisend-550-dollar. Die prys van goud is twee-duisend-568-dollar-75-sent per fynons en die prys van Brent ruolie 71-dollar-90-sent per vat.
===============
15 November
08:00
# Vroulike polisiekonstabel gewond in skietery in Embalenhle
# Departement van Internasionale Betrekkinge veroordeel Israelse regering oor moontlike anneksasie van Wesoewer
# Tennis: Sinner en Fritz deur na halfeindronde van ATP-jaareindtoernooi
# ‘n 32-jarige vroulike polisiekonstabel word in die hospitaal behandel na sy Woensdagaand geskiet is. ‘n 35-jarige man is ook geskiet, en het gister weens sy wonde beswyk. Die voorval het in Embalenhle plaasgevind. Skote is gehoor, die polisie is ontbied en die slagoffers is met ernstige skietwonde langs ‘n voertuig aangetref. Die verdagte, ‘n 35-jarige man, is tussen Potchefstroom en Ventersdorp in Noordwes vasgetrek. Die motief vir die skietery is tans onduidelik. Volgens die polisie kan dit moontlik met huishoudelike geweld verband hou.
# ‘n Man van Matsulu is deur die Hooggeregshof in Mpumalanga skuldig bevind en tot 25 jaar direkte gevangenisstraf gevonnis vir die moord op sy meisie. Volgens Monica Nyuswa, die woordvoerder van die Nasionale Vervolgingsgesag in Mpumalanga, het Yvonne Shabangu en die 24-jarige Sibusiso Ngobeni saamgewoon. Hy het haar van ontrouheid beskuldig en het in September verlede jaar haar bus naby ‘n vulstasie in Mbombela ingewag. Hy het haar doodgeskiet voordat hy weggejaag het. KLANK:
# Die minister van Samewerkende Regering en Tradisionele Sake, Velenkosini Hlabisa, maan regeringsdepartemente om hul munisipale skuld te betaal. Departemente skuld munisipaliteite sowat 29,4-miljard-Rand. Hlabisa het in antwoord op vrae in die Parlement gesê sy departement wil seker maak planne vir finansiële herstel by munisipaliteite is in die langtermyn volhoubaar en word doeltreffend ingestel: KLANK: ENG HlabisaOnMunicipalities
# Die Departement van Internasionale Betrekkinge en Samewerking doen ʼn beroep op die internasionale gemeenskap om die Israelse regering teen te staan omdat hy volgens hom sy verpligtinge onder internasionale wetgewing versaak, en oor resolusies wat verband hou met sy besetting. Die departement sê hy is ontevrede oor ʼn verklaring wat aan Israel se minister van Finansies, Bezalel Smotrich, toegedig word waar hy blykbaar vra dat die Wesoewer geannekseer word. Die departement sê Suid-Afrika is gekant teen Israel se anneksasie en uitbreiding op Palestynse grond.
# Sport: KLANK:
# Die rand verhandel teen 18-rand-26-sent teen die dollar, 19-rand-25-sent teen die euro en 23-rand-15-sent teen die pond. Bitcoin verhandel teen 87-duisend-737-dollar. Die prys van goud is twee-duisend-565-dollar-65-sent per fynons en die prys van Brent ruolie 71-dollar-90-sent per vat.
================
15 November
09:00
# Mej. Suid-Afrika onttrek aan Mej. Heelal-kompetisie weens gesondheidsprobleme
# Stigting skenk Chinese keramiekversameling ter waarde van 23-miljard-Rand aan Britse museum
# En Rugby: Australiër gekies as nuwe voorsitter van Wêreldrugby
# Mej. Suid-Afrika, Mia le Roux, moes haar noodgedwonge aan die Mej. Heelal-kompetisie onttrek weens gesondheidsprobleme. Sy sê dit was uiters moeilik om hierdie besluit te neem want sy weet daar is drome en hoop op haar gevestig. Die Mej. Suid-Afrika Organisasie sê Le Roux het deur hierdie moeilike tydperk ongelooflike moed en grasie aan die dag gelê en haar gesondheid en welstand is die hoogste prioriteit. Mej. Heelal word Saterdag in Mexikostad gehou.
# Die Limpopo-regering maan ouers om kalm te bly nadat 75 leerders van Dzumeri Primary School gister weens vermeende voedselvergiftiging in die hospitaal opgeneem is. Die leerders het blykbaar melk gedrink waarna hulle siek geword het. Die Limpopo-premier se woordvoerder, Thilivhali Muavha, sê slegs elf van die leerders het vir verdere waarneming in die hospitaal oornag en is tans in ʼn stabiele toestand: KLANK: ENG ThilivhalionLearners
# ‘n Privaat Chinese keramiekversameling met een-duisend-700-stukke en ‘n geraamde waarde van 23-miljard-Rand, is aan die Britse Museum geskenk, wat ‘n rekord vir Britse instellings is. Die sentrale Londense museum het aangekondig die Trustees van die Sir Percival David-stigting het die versameling permanent geskenk sodat dit aan die publiek vertoon kan word. David is in 1964 dood en was ‘n Britse sakeman met ‘n sterk belangstelling in China en die Chinese kultuur. Hy het keramiekstukke uit Europa, Japan, Hong Kong en China versamel. Sy versameling is reeds sedert 2009 aan die museum geleen.
# Rugby: Australiese rugby staan dalk voor verskeie uitdagings maar hul eie Brett Robinson is gister tot voorsitter van Wêreldrugby verkies. Die 54-jarige voormalige toetsflank en chirurg wat ʼn sakeman en sportadministrateur geword het, is die eerste permanente voorsitter van die globale beheerliggaam van buite Europa. Robinson was nege jaar lank op die raad van Rugby Australië en het ook terselfdertyd op die uitvoerende raad van Wêreldrugby gedien. Hy streef na vernuwing en sal in beheer wees van die Nasieskampioenskap wanneer dit in 2026 afskop.
# Die rand verhandel teen 18-rand-28-sent teen die dollar, 19-rand-26-sent teen die euro en 23-rand-16-sent teen die pond. Bitcoin verhandel teen 88-duisend-056-dollar. Die prys van goud is twee-duisend-556-dollar-61-sent per fynons en die prys van Brent ruolie 71-dollar-73-sent per vat.
# En die uitvoerende hoof van MultiChoice, Calvo Mavela, sê die transaksie van 55-miljard-Rand met Canal Plus sal mededinging met Netflix versterk. Volgens Mavela sal die ooreenkoms mededingendheid regoor Frans- en Engelssprekende Afrika verbeter, en dit moontlik maak om vir beter inhoud te onderhandel met meer potensiaal vir verhoogde inkomste. Mavela sê ten spyte van uitdagings soos die verlies aan intekenaars, kan die vennootskap ʼn intekenaarsbasis van 50-miljoen skep wat beleggings in plaaslike inhoud en sport sal versterk.
=================
